خيوط المهزلة

ازرعينـا مطـر.. وإلا اتركيـنـا ورانــا

شي تافـه حقيـر.. نسولفـه.. واتركينـا

فـي زمـان التذبـذب حظنـا مـن غبـانـا

غير زرع الشكـوك.. وخوفنـا مـن حدينـا

المسافة طويلة؟؟!! أو قصيرة خطانا؟؟!!

أو ترى الوقت كله ضاع منا.. وفينـا؟؟!!

ايه ضقت بقصيدي.. أو ترى هو نسانا؟؟!!

آه.. حتـى القصايـد شكلهـا مــا تبيـنـا

عشش الليـل فينـا.. وانتشـر.. واحتوانـا

والتدابيـر ضاعـت مـن سـواعـد يديـنـا

كـل دربٍ نخطـه.. ثــم جـانـا بـلانـا

كـل بيـتٍ نشيـده.. طـاح سقفـه علينـا

ضجـت الأرض منـا.. وارفضتنـا سمانـا

والشـوارع تنـادي: يـا رمـال احرقيـنـا

كـل مـا قـام ذيـلٍ شـل سيـفـه وجـانـا

وبعد لحظـة يغيـب.. وزول غيـره يجينـا

أتفكر.. وأقـول.. وانفجـر: وش دهانـا

أثـر حنـا بلانـا فــي بعضـنـا بليـنـا

عشقنـا للمـهـازل.. والمـهـازل معـانـا

مـن سنيـن وخيـوط المهـزلـة تحتويـنـا

والمحاني مريضة.. والمـرض فـي دمانـا

ذا قدرنـا التعيـس.. وشكلنـا بـه رضينـا

واطلبـوا الله يمـنّ ويلتـفـت ويهـدانـا

وإن رحـم واجتمعنـا.. نختلـف لا مشينـا