درايش: سهر

 

ما بقى كثر اللي فات.

ثلث عمر... وذكريات.

دارت الدنيا علينا

ما شكينا...

ولا بِعنا في المودّه وما شرينا

المعزّه... مِن نِعزّه

والمودّه... من نِودّه

ما تغيّر شي فينا

والوفا... فينا ... حياة.

واللي ساكن في الحنايا

حتى لو دارت رحايا

وطْحنَتْ لهفات عينه

يبقى فينا

له مودّه، وله معزّه، وله غلاة.

يا مراكب شرّقت والموج عالي

يا مواني خاليه من الشوق... تصْفر

يا منازل نايمه بحضن الظلام

وناسيه هذي الشوارع

موحشه والليل خالي

متى صُبحك؟!

متى شمسك؟!

متى نتْفنّس  حياة؟!

السهر: مو ليل عابر

والحزن : مو دمْع صابر

والوفا: ما هو معابر

يم زمن ولّى وفات!

السهر: إحساس إنّك

طير عالي

والحزن: طعن الخناجر

من يمين ومن يسار

تسوّي نفْسك ما تبالي

وانته أقرب للوفاة.

والوفا: إنّك تموت أمرار

من انسان غالي

وتبقى عنده

تحت ظلّه

عارف إنّك لو يغيب وبعد عينه

ماكو في الدنيا... حياة.