درايش: مرشّحك للبيع!
نشر في 15-03-2024
آخر تحديث 14-03-2024 | 17:52
مرشّحك هذا بأمر المعازيب
هُم نزّلوه وواسمينه بعلامه
علامته... إيده تأشِّر على الجيب
يعني اترِسُوا جيبه... يبدّع كلامه!
وعلامته... ترْك الأمور المواجيب
ما له قَدِر في الناس وإلّا كرامه
وعلامته... ضبْعٍ لبَس هيئة الذيب
في داخله طبْع الردي وانهزامه
وعلامته... خَفْضة جبين المناديب
ما خالف بعمره أوامر عمامه
اتْرك صبي ما همّه النقْد والعيب
فاقد حياه وما تهمّه الملامه
وخلّك مع اللي ذِكْرهم نفحة الطيب
هم الأمل كل ما غشَتْنا غمامه
بالمجلس القادم أشوف الألاعيب
والله يستر من سواد الجهامه!
