درايش : عرب من «حزب شاس »!
نشر في 01-12-2023
آخر تحديث 30-11-2023 | 20:28
عذرك إنّك مختلف ويّا «حماس»
وإلّا ماخذ ضدّهم موقف سياسي
ما يبرّر سكتتك عن ذبح ناس
ومجزرة أطفال في الوقت القياسي
انت لا فكْر ومبادئ بالأساس
ولا عندك شي في عمرك أساسي
كتلة أفكارك أخف من النحاس
لا ذهب شايل ولا معدن نحاسي
چِن رايك ماخذه من «حزب شاس»
للضحايا ما نوى قلبك يواسي
تدّعي «لبرال» وتعاني التباس
أو «يساري» ضاع ما بين المراسي
اليسار اللي انتهى بالإنتكاس
وكان فكره في البشر ثابت وراسي
صارت آراءه تجي حَسْب المقاس
وفي القضايا بين متذكِّر وناسي!
مو «حماس» اللي انْزَعَت فيك الحماس
وموّتت قلبك وصار اليوم قاسي
انت أصلاً فاقد الشرط الأساس:
«جِينة» الانسان إن شاف المآسي
———————
* حزب صهيوني ديني متطرف
