درايش: نبطي/ فشقه
نشر
في 05-06-2026
آخر
تحديث 04-06-2026 | 20:14
لا سقى الله وصْلٍ تحتويه اشْفقَه
چان ما هو حقيقي وطافحٍ فيه شوق
كم سُبَقْني زماني وما قدَرْت ألحَقه
لكن الغيم أنْذَر بالحقوق الصدوق
نظرة العين جَتْني كانطلاق افْشِقه
يوم سدَّد ب رَمْيه فوق عِرْج الخفوق
والبروق إلعَبَت بي مشْمله مِشْرقه
چنّها نار تصلي لا حشا مو بروق!
نابي الأرداف رَشْفَه واعتبرها اصْدقه
بارد الماي والله ما يبِل العروق
يا رشَاش السحابه ويا بياض اوْرقَه
إنْتشِلني - فديتك- واجْذِب الروح فوق
إمّا ترْوي المعَنّى أو حرام... إعْتِقه
وقْفَة الحال هذي تُوجبك في حقوق
