درايش: مضاوي

«إن جاك ولد سَمَّه موضي» 

                                                         (مَثَل شعبي) 

إلى مضاوي... على لسان أبوها: 

يا نسايم بارده وأوراق تين

يا حديقه من أمل في قلب هاوي

وَرْد صُبْح وضحكة الغمّازتين

وراحة المكسور من بعد التداوي 

ما دريتِ اشلون لمّا تضحكين 

تنفتح روحي على النجم السماوي

وما دريتِ القلب لمّا تزعلين 

ينكتِم والكون كل الكون خاوي

يا القريبه وفي ضلوعي تسكنين

ما تجي الدنيا على حَسْب المناوي 

يوم ضيق، ويوم شِدّه، ويوم لِين

وبين هذا وذاك تاخذنا الخطاوي

نبذل المجهود في خاطر أمين

(وعن سبب) يجري القِدَر مو بالتساوي

بس واللي صَوّرچ كالياسمين

وفي عيونچ نور في كل وقت ضاوي

لو تردّى الحظ في عثرة اسنين

تقْطفين الورد باچر يا مضاوي