درايش: «رواتب استثنائية» للشعراء

نشر في 25-01-2023
آخر تحديث 24-01-2023 | 20:23
 وضّاح

ساهرٍ ليله على نظم القوافي

داخل بحور الشعر في كل هِمّه

يلقط المحّار لو بالقوع خافي

في الدياجير الغميجه المدْلهمّه

ويعرض اللولو الأصيل ودر صافي

لا افْحصه الطوّاش ما يقدر يذمّه

وما يعَرفه غير طوّاشٍ سنافي

زود حرْصه بقطعة المخْمَل يلمّه

كل شاعر يستحق «راتب إضافي»

وكل شاعر... عنده هذي مو مُهمّه!

الشعر خاواه مثل انسان وافي

ما يباع... ودفتره بمليون ذمّه

ولو يشوف الخير في هالدار ضافي

ما يبي «استثناء» أو مبلغ يتمّه

ساترٍ حاله ولو بالصج حافي

وغير هَم الدار ما شيٍّ يهمّه

لكن الوضع انحرف يالله يا كافي

اكفنا شر المطامع... لا تعمّه

صار كلٍّ بالعلن وإلا الخوافي:

البلد ما بينهم مشفوط دمّه

back to top