درايش: شنو ورا باب السنة الجديدة؟
نشر
في 05-01-2026
آخر
تحديث 04-01-2026 | 20:48
النصيب يجيك چان انّه نصيب
مثل شَبْك احْبال صايد لك رشا
شي تصيبه وشي لا يمكن تصيب
لو تنيشِن ما تصيبه، لا حشا
يا صباح الخير يا الكون الرحيب
يا نسايم بَرْد مرَّت مُنعشه
في بداية عام والقادم مُهيب
وما لقينا شخص بأسراره وشى
ليت من طَل وكِشَف بطْن الجلِيب
هي بشاير أو حيايا معششه؟!
نجهل اللي من ورا الساتر يغيب
كالضباب إن عَم في الدرب وغشى
الخواطر صبَّحَت شخصٍ غريب
ومن رذاذ غيومها قلبه انتشى
كل ما ناديت خاطر يستجيب
چن قلبي بْساط للضيف أفْرِشه
دايره الأفكار في مبْخَر وطيب
إلا خاطر في الضماير ما مشى
يوم إيدي صافَحَت إيد الحبيب
هزّني التيّار من أقصى الحشا
وخِفْت يشْغلْني وياخذني وأغيب
من طلوع الشمس لأذان العشا
