درايش: عزم وخطاوي
نشر في 20-01-2023
آخر تحديث 19-01-2023 | 20:14
عسى ربّي ييسّر لك خطاوي
على درب المشاوير الطويله
وتحقّق بالأمل ما كنت ناوي
وتمشي في حمولك لو ثقيله
يبي لك قلب للأزمات قاوي
وكل ما لان حيله تشد حيله
وتنقذ دارنا من هالبلاوي
فساد ونهْب وأطباعٍ دخيله
ولكن بالعدل ويّا التساوي
ولا غايه تبرّر أي وسيله
ولا بن عم أو شخصٍ فداوي
عن القانون تحمونه ب حِيله
بِري من تهمته وكل الدعاوي
واهو بالأمس منشورٍ غسيله!
ويمر الذيب بين الناس عاوي
ويشوفونه ولا باليد حيله
تمل الناس وتخيب الهقاوي
إذا مر الزمن ما من حصيله!
تعبْنا من الرجاوي والمناوي
وأحيان الصبر ماهو فضيله
