درايش: رحلة
نشر
في 14-11-2025
آخر
تحديث 13-11-2025 | 18:45
ويّاچ بالرحله بكل التفاصيل
مثل القطار اللي يرافق حياتچ
أضْوي لچ القنديل إن أظلم الليل
ووقت القوايل فوق راسچ عباتچ
أشد عزمي وارتفع بالسما حيل
كالنجم وآخذ ما دنا من صفاتچ
لا غيّر الله بسمتچ بالمقابيل
ولا نقّص الله قطرةٍ من حلاتچ
صدري بَرَاحاتچ تطارد بها الخيل
وكفّي الأمان اللي يهدّي التفاتچ
روحي وعَلِّي ورافقي نجمة اسهيل
منهو الذي مثلچ يشابه لذاتچ
حُب «الأبو» ما ينْحسِب بالمكاييل
مثل النهر يسقيچ انتِ وخواتچ
مكْبَر غلاچ اللي تطامى كما السيل
وهذا الغلا باچر يصير لبناتچ!
