درايش: كلام
نشر
في 12-11-2025
آخر
تحديث 11-11-2025 | 20:07
بعض الكلام يدور من حولك ايزِن
زَن النحَل إن دار سِرْبه علينا
وبعض الكلام اتْهَمّله لكن ايحِن
مثل الخلوج الطافحه بالحنينا
وبعضه يضر راعيه لو يحسِن الظن
مثل الفَراش اللي تطاير بدينه
وبعض الكلام الضحْك ما فارَق السِن
امزاح طعْن ارماح قاصد حدينا
يالله لا تنزل عقوبه على من
من بعْد خشمه توقف احدود عينه
هذا الذي لو عمّر اسنين بالسِن
تلقاه نَفْسه ومشْيته بالهوينى
لا فاهم الدنيا ولا ناشدٍ عن
معنى الحياة وصعْدته للسفينه!
لا النصْح فاد ولا النهي علّمه فن
والعقل ما ينبت ولو زارعينه
راعي الوعي تعبان من صحوة الجن
وراعي البلاهه يقول مو فاهمينه!!
