يقرا بليّا مكاتيب

قصيدة تقطر دماً وتنبع بالاسى على ما لقيه هذا الاب المسن من عقوق من ابنائه، بعد ان رحلوا عنه وتركوه وحيدا يشكو همومه ويدعو عليهم بسبب هذا العقوق ذاكرا طيب فعاله معهم في صغرهم.

قال الذي يقرا... بليّا مكاتيب

ياللي تقرون العمى... من عناكم

يا عيال ياللي... تشرفون المراقيب

تريضوا لي... واقصروا... من خطاكم

خوذوا كلام الصدق... ما به تكاذيب

مثل السند... مضمون للي وراكم

يا عيال... لا صرتوا... ضيوف ومعازيب

ترى الكلام الزين... ملحة قراكم

وترى السبابة... من كبار العذاريب

وهرج البلايس... ما يطوّل لحاكم

المذهب الطيب... ترى... مذهب الطيب

والمذهب الخايب... يبوّر نساكم

يا عيال... ما سرّحتكم... باللواهيب

يا عيال... ما عمر المعزّب... ولاكم

يا عيال... ما ضرّبتكم... بالمشاعيب

ولا سمعوا الجيران... لجة بكاكم

من حبكم... ارطّب القلب... ترطيب

يفزّ قلبي... يوم يبكي حداكم

ياما تسلوعت القبايل... تقل ذيب

من خوف... لا يقصر عليكم... عشاكم

أحميت رجليني... بحامي اللواهيب

وخليت لحم الريم... يخلط عشاكم

وياما قطعت من الفيافي العباعيب

اجيب من صيد البراري... غذاكم

واليوم... هذي لحيتي... كلها شيب

هذا زمان قعودنا... في ذراكم

يا عيال... بعتوني... بصفر العراقيب

ما هي حقوقي... سود الله قراكم

قمت اتوكّا... فوق عوج المصاليب

قصرت خطانا... يوم طالت خطاكم

يا عيال... من حقّي عليكم... مطاليب

ردوا لي القرضة... جزا... من جزاكم

ماني بفاضحكم... بوسط الاجانيب

باعمالكم... يدرون كل اقرباكم

لو كان تدرون الردى... والمعاييب

صرتوا مع المخلوق... مثل اخوياكم

المنسب الطيب... ترى المنسب الطيب

المنسب الطيب يزكي خفاكم

خوالكم... بالطيب... تروي المغاليب

ولو تتبعون الجد... محدٍ شناكم

وش علمكم... يا تاركين المواجيب

حسبي عليكم... هالردى... وين جاكم؟

يالله عسى اعماركم... شمسها... اتغيب

ويعتم قمركم... ثم تظلم سماكم

يا علّكم... في حاميات اللواهيب

ياللي على الوالد... كثير لغاكم

نصحتكم... واسندت... وادي سلاحيب

لقيت بالصبخا... مدافيق ماكم

الناس تدري... بالردى والمعاييب

لاقبل حديكم... قيل... جاكم بلاكم

شفت الجفا والحيف والغلب والريب

بطلوعكم... لا بيّض الله... قراكم

إخسوا... خسيتوا... يا كبار اللغابيب

إهبوا... هبيتوا... يقطع الله نماكم

عسى نساكم... ما تحمّل... ولا تجيب

ولحدٍ من البزران... يمشي وراكم

صيور ما هو... عاوٍ بيننا... الذيب

بالقبر... ما افرق طيبكم... من رداكم