عينك تنام

يا شين طبعك ويا شينك ويا شيني

ويا طول صبري عليك وقوّني والله

كسرت لك خاطري وأسهرت لك عيني

وإلا أنت عينك تنام وخاطرك فله

أنا ذبحني غيابك وأنت جافيني

والحال من غيبتك تشكي ومنسله

وعليك قلبي ورى الأضلاع مشقيني

ما باقي إلا تشق الصدر وإتله

جمعت لك حبْ سويته من سنيني

عل العمر ما بقى به يحترق عله

واشتقت لك لجل أعيشك فرحةٍ فيني

وملعون أبو الشوق صارت علته عله

قربك فخر عن جميع الناس مغنيني

ياما حكوا في غيابك من جهل خله

وخليتهم لجل عينك لا تخليني

لا يا بعد كل زينٍ معجبه ظله

ما همني الغير، غيرك ما يعنيني

لجلك قطعت الوصل بالكون ذا كله

وهذا أنت لك مدةٍ مبعد وناسيني

ماهوب حقٍ ولا شرعٍ ولا مله

بعطيك فرصة ثلاث أيام وتجيني

وإن جيت بتشوفني كيف أدمح الزله

وإن كان طولتها أرجوك تعفيني!

غيرك يبيني وأنا مانيب كرهٍ له