البتول
نشر
في 02-07-2010
آخر
تحديث 02-07-2010 | 00:00
كل أرض تشيلك يا ثقيل الحمول وكل وقتٍ كريمٍ بالرضا والزعل
وين ما رحت تلقى لك حبيب وعذول وين ما كنت تلقى مثل ياسك... أمل يا طريق الترجي والوله والنحول والله إني مشيتك... لين حد الثمل ما لقيت فوصولي لغير قبري وصول ولا عرفت فحياتي مثل عرفي الجهل لا تظن المسافر من يسوق الرحول من وقف دون حلمه عاجزٍ ما رحل وما لمخلوق منجا في الحذر والجفول ما تصيب السهام ولا يطيش الأجل الليالي خواتٍ مير منهي البتول والحوادث عشاير مير وين الفحل ليلةٍ لك وليله بالفرح ما تطول وليلةٍ من شهدها ذب راس الجبل أتذكر في عين الشمس طفلٍ خجول شالته في هدبها وقت لين اشتعل أعجب الناس وهجه بالجدل والفضول ما دروا عن (جمال الجرح) لين اندمل والله إني كتبته في العطش والذبول لين غصنه تعدل بالورق واعتدل والله إني كتبته لين قال الجهول والله إني كتبته وانتشى واحتفل ما أتفه الشعر كانه هالحكي اللي نقول لا تعدى المديح ولا تعدى الغزل إن لثمت الزهور وصاحبتني الحقول ما هقيت إن صافي الشهد عيب النحل ما بقى في ضلوعي كود ريح معمول وثوب شاشٍ عليه من الندامة وحل ألتفت للطريق وما عبر منه زول في جفوني تزاحم عبرتي والوجل طلت يالعمر والّا قلعتك لا تطول طاولتنا الليالي بالسهر والملل إن تعبنا نحب ولا لقينا قبول ما تسر الأماني ولا يفيد العذل لكن الله كريم وكل همٍ يزول ما على الله بعيــد ولا جفاك المحل كل أرضٍ تشيلك يا ثقيل الحمول وكل وقتٍ كريمٍ بالرضا والزعل* بدر بن عبدالمحسن
