انكسار الشوف

مابين انكسار الشوف والواقـع المخمـور

بنيت الوصـال وهدنـي صمـت خلانـي

وروّضت صحوة ذكرياتي على الميسـور

ورفعت ابتسامات الامل لأخـر احزانـي

حبيبـي ودولاب الزمـن والحيـاة يـدور

وانا واقـفٍ مابيـن وصلـك وهجرانـي

تعلمت من قسـوة زمانـي ثـلاث امـور

غلاك وصمودي واجمـل سلـوم جدانـي

واخذت اتأمـل حلمـي الغافـل المذعـور

مابين الصخب في صدري وصمت جدراني

اقلّـب خفايـا حيرتـي والحيـاة سطـور

وابعثر تعـب عمـري والايـام تقرانـي

لقيت اول خيـوط الامـل واقـعٍ مكسـور

وشحـوبٍ علـى مـر الليـال يتمرانـي

اناجيك وأغفو واحتضنك وتضيـق بحـور

واسولفك واقـرأ فـي سوالفـك خذلانـي

اردد غلاك وينتثر فـي فضـاي زهـور

واتمتم بحسنـك ليـن يشربـك وجدانـي

واعوّد بضيق اخطاي وألمحك شمعة نـور

تسولف لها غربة خفوقـي عـن اوطانـي

وأمد الوفا وينام وصـل وتهيـم صـدور

وانا أقلّـب اوراق الرضـا قبـل تنسانـي