قدامنا سكة سفر

أنا فـ هواكي لجأت للتنجيم

شفت الأتر... ياوتر

عاصي على التقاسيم

شقّيت بحار السحر بعصياني

وكأني لسه فـ البراري كليم

وهربت م الشخشيخه لاصبح زيّها

وكأس لسه في الحواري يتيم

عيني الودوده راية العصيان

قلبي المعاند... راية التسليم

أنا فـ رضاكي لجأت للشيطان

طمع فـ حبك بدّل الأوطان

سكّني قصر الشوق

واستوطن الغفران

أنا في غُناكي هربت م المواويل

أما الأصيل انسعر وهب فيّا النيل

جريت وصوتي انشرخ

في غابة الإنكار

بحر الأيادي صرخ

حاسب من الإبحار

جبل العيون شدني

أنا تهت فـ السراديب

دمعك بيشفي كل ليله طبيب

إيدك بتقتل كل فجر حبيب

الموت حضر جثتي

يكفي بأه تعذيب

عدي فـ دمي بهداوه

وانسلخي م الشريان

وافتكري عز الأسى

أنا كنت جسر حنان

أنا كنت سقف زمان

في عشة المظاليم

أنا فـ هواكي لجأت للتنجيم

وعملت لك عمل المحبه حجاب

وقريت فـ كفي يطول العمر بالإنجاب

وفتحت مندل أشوف

اللي انسرق عمري

ولّا الوليد اللي لسّه عينه على الأبواب؟!

ولّا الوليد اللي سيفه

يدّي الرمله عنوانها؟!

لقيتنا جوّه جنينه نضحك لرمانها

والقهوه تضحك علينا جوّه فنجانها

قدامنا سكة سفر

يمكن مانرجعهاش

قدامنا سكة فرح

يمكن ح نحزنها...!