اخر وطن: دم الوطن

مسفر الدوسري

نشر في 06-06-2007

مسفر الدوسري

فخخوا قلب النهار

حاصروا نوم الصغار..

بحلم نار.

شوهوا صوت الله فينا

شوهوا شرعه ودينه

فززوا فينا السكينة..

خلوا عين الحق تدمع

والحزن يملأ المدينة!

خوفوا فينا السلام

وطيروا..

عن مرابعنا الحمام

والأمان.. في قلوب أطفالنا..

عيا ليلتها.. ينام

وحلمنا في باكر أجمل..

من جفون الشوق.. طار..

بانفجار..

يشبه الحقد اللي فيهم

يشبه ايدين الظلام اللي خانتنا ورعتهم..

لين مشاعرهم بقت..

كومة احجار!!

انفجار..

قاسي..

وظالم..

جاهل..بغفلة ليس له..

ثوب.. عالم !

يدعي بنفسه بطولة..

وهو جبان

في توالي الليل يسري..

ومتخفي..

كنك تطارد شبح

لا ملامح..

لا معالم

يشبه اللي نفذوه

يشبه اللي برروه

يشبه اللي عن جريمتهم سكت

يشبه اللي ما نهاهم

بحجة انه كان.. مسالم!

او حالم..

او صلى..

واستخار

وخلى هالفكر الظلامي

ينتهك دم الوطن..

بقلب اسود..

وانفجار.