فقدتك

فقدتك

أنا والليل

وآهات الألم والهم

أنا والشوق

نتبعثر ولا نلتم

أحس بخافقي غصة

وأشوف الموت في بعدك

لو جاني يكون أرحم

جبرك الوقت تتركني

وما ودّك... تحدد موعد الفرقا

عذرك واهي ومُبهم

وين عهدك؟

تبقى للأبد وياي...

أتذكر عهود اللي كتبناها

وأمانينا الرسمناها

أتحسف...

أحس بخافقي حرقه واتبسم

أنا مازلت على عهدي

أنا لك ماني لغيرك

أنا مازلت... في ليل الألم والخوف

أهوجس بك في أحلامي وأتكلم

أدور لك على أعذار

تبرر موقفك وياي

وأشوف أشباح مجنونة

تقول لي: خاين وكذاب

أحاول بإيدي أخنقها

وأعلقها... على جدار الأسى والوهم

وأشوفك في مدى روحي

جرح غاير

يفز قلبي

وأقول: يا رب انا أحلم

ترميني الظنون ابعيد

وتلقفني هواجيسي

أنا وحدي أعاني لوعة الحرمان

وانت بدنيتك لاهي

وكاد إنك... بفراقي تتهنّا وتتنعّم

الآه بخافقي تصرخ

يفز دمعي ويحرقني

فقدتك يا ضيا روحي

وإنتَ بالفقد أعلم

بعدني أقترف أعذار

وأعلقها على اغيابك

وأقول بعده... بفنون الهوى جاهل

اصغير قلبه ومسكين

بكره في الهوى يفهم... ويتعلم