ألف موال

أنا كذا من غير ما اشرح لك الحال

جرحي مشرّع والعواصف تهلّه

ميّلت حزني... مال بي ألف موّال

سيّلت دمعة.. وانبرى الدمع كلّه

كن الدموع تطيح مني... وتختال

أو كنها لا حوّلت... مسفهلّه

ويوم اختنق في صوتي إحساس رجال

صبيت له من ضيقة البال دلّه

كنت انتظر في صمت.. وبموت الامال

كتبت لغز وما تمكنت احلّه!

يامهرتي: ما عاد للخيل خيّال

لو في يمينه سيف دايم يسلّه

والله مدري كيف هالحزن ينقال

لا ضاع من قلبي عيوني تدلّه

أكذب عليك إن قلت ما جا على البال

حزني... وأعرفه زين...جا في محلّه

والبارحة صبري على وحدتي طال

حبله تعقد بي وحاولت افلّه

يا شينها لا صرت ظامي على جال!!

الريق ناشف وأنت عاجز تبله