شظايا الهم

ليه انكسر.. مثل القزاز...

كل مرةٍ.. ابوح همي تسمعه..

يا صاحبي.. وش حاجتك..

بغرشةٍ.. طاحت على أرضٍ عزاز

تجمع شظاياها بيدك..

وش حاجتك.. فما تجمعه

لي صاحبٍ.. كل ما سالني واشتكيت..

همي عليه.. لازم يجرح اصبعه..

واصاحبي.. الشكوى بها ذل

حدٍ رهيف.. إن ما جرح.. يقتل

الشكوى.. ما تلبس ثياب..

عريانةٍ.. تحثي التراب في وجه راعيها..

أموت انا لو قلتها.. واموت ابخفيها..

ان كان لي عندك.. جواب..

قم دلني على طريق..

ما هو يوصلني طريق..

ياهل ترى به يمةٍ.. غير الجهات الاربعة

يا اللي انكسر مثل القزاز... كل مرةٍ..

ابوح همي وتسمعه

اطلق حبال الليل.. خل الظلام يسري

المركب اللي كل ما فل الشراع

قلنا بعد.. بدري..

ابي اوقض النوم.. واهدهد سهادي

وادفن في صدر وسادتي.. سري المباح..

بعد اللي راح.. عنادي

يا صاحبي.. مانيب الومك لا..

لا على موتي.. ولا لميلادي

نجمٍ يغيب.. خله يغيب

وان طاح لا.. لا ترفعه

انا ليه أنكسر.. مثل القزاز

كل مرةٍ.. تدري بهمي وتسمعه.

* بدر بن عبدالمحسن