صاحبي يلبس البرقع ما هي عادةٍ له

مير اخذ سلم جيرانه وصارت طبيعه

Ad

مثل من قال لاجيت الوطن خذ دله

اتبع الناس وان ماطاعك الوقت طيعه

هيه ياللي مكلفكم على برقعٍ له

وسعو قرضته ترى عيونه وسيعه

فصلو له حريرٍ ناعمٍ مايمله

حيث بشرة خدوده بالتأثر سريعه

صاحبي لاهرج تشفق على هرجتٍ له

من حلاوة كلامه كن هرجه يبيعه

ويوم اشوف المحاجر والرموش المظله

وعاتقن كنه رقبة الغزال الرفيعه

ياصلاة النبي وش جمع الزين كله

لو بحليه كنه بالاصايل طليعه

كاملٍ زينه الصافي وهي تستغله

بالعقل والا انوثه والمحاسن فظيعه

عيني الي على شوفه ودودٍ مغله

ماغفى جفنها تمسي وتصبح فجيعه