طير الهوى

ياما حلا الفنجال مع سيحـة البـال

في مجلـسٍ ما فيـه نفـسٍ ثقيلـة

هـذا ولـد عـمٍ وهـذا ولـد خـال

وهـذا رفـيـقٍ مالقيـنـا مثيـلـه

ياليـت رجــالٍ يـبـدل بـرجـال

وياليت فـي بـدل الرجاجيـل حيلـة

يابو هلا طير الهـوا خبث البـال

الطير نزر والحبـاري قليـلة

ويالله ياللي طالبـه ما بعد فال

ياللي من الضيقات ينجـي دخيلـه

افرج لمن قلبـه غـدا فيـه ولـوال

والنـوم ماجـا عينـه الا قليـلـه

لي من ذكرت رمـوس عصـرٍ لنـا زال

شوف الفياض وفقـد عـز القبيلـة

يازيـن شدتهـم ليـا زوع المـال

يتلـون بــراقٍ تــلالا مخيـلـه

يتلـون براق سمـر عقب الامحال

تلقى التريبي فايـضٍ غب سيلـه

يسقي خسيفا والثمان ارضهن سـال

مرتع معطـرة السيـوف الصقيلـة

اللي ليا ركبوا على كل مشوال

يفرح بهم راعي النياق الهزيلة

من جوّ (ساقانٍ) الـى السيـف همـال

وينوش (حسنـا والرديفـة) هميلـه

ولي قادنا مـن يمّـة القفـر خيـال

يصبح شديد البـدو عجـلٍ رحيلـه