الخوف له عدة تصانيف وأشكال
وأصعبهم اللي تحس ماله نهايه
مجهول مو واضح ولا يرسم ظلال
وفي الدرب ما يرفع علامه ورايه
فيه خوف مثل الهمس... يشغل لك البال
چنّه عن الأيام يرسل وشايه
«خوف الحدث» قبل الحدث يتعِب الحال
وتعيش وقتك دون معنى وغايه
أو «خوف فقْد»... يصير في كل الأحوال
ما لك عليه إن صار حكْم ووصايه
أو «خوف وقْت»... وتنتظر موعده طال
ما يمنعه درْعٍ لبسْته حمايه
و«خوف البدايه»... يربطك دوم بحْبال
حتى ولا تقدر خطاوي البدايه
الخوف موت إن كنت ما تفهم الحال
عَزْفه بعيد... ويوصلك صوت نايه