يا ليت تكتبني رساله على السِيف
وعقب السجي ترجع تدوّر مكاني!
يمكن تحس شلون فرقا المواليف
وتشوف منهو يْعَوّضك عن حناني!
نكتب ونبني ونبذل الجهْد ونضيف
وكل ما كتَبْنا ينمحي في ثواني
حيث الزمن بيده يدير التصاريف
وكم كنت أظن لي دبرةٍ في زماني
دنياك هذي ما عليها تحاسيف
كل شي فيها - وإن تناسيت- فاني
وإن دارت الدنيا وعيونك ذواريف
وردّيت يم السِيف قلبك يعاني
يا دوب تلقى من الرساله تناتيف
وماي البحر غاسِل جميع المعاني!