تذكار عن فكره لها سبعة أعمار
من شخص أهْمَل فكرته ما يبيها
يمشي بسكّه مظْلمه مالها أقمار
ولا قِدَر- من غَفْلته- يحتويها
مشغول باله بالتفاكير محتار
وتراكُم النسيان باني عليها
فكره أوصِّفْها كما صَك دينار
طاحَت من أفكاره ولا حَس فيها
أقْفى وخلّاها تحت كُومة غبار
لا داريٍّ فيها ولا محْتِريها
عشرين عام وما فِتَح خَزْنة أفكار
مثل النشوز اللي حَلَف ما يجيها
أخَذْتها وحمِّيتها في لَهَب نار
وصارت كما النيرات من يشتريها
الموهبه يا صاحبي تنقلُب عار
إن ما كِسَرْت قيودها عن ايديها!