يا رفيجي صاحب الخَط اليساري
الزمن هذا يمينٍ في يمين
العقول اليابسه... جارك وجاري
لا تحاول... ما تغيّرها السنين
والهبوط اللي حسَبْناه اضطراري
كان خدعه دبّروها الطامعين
عنصريّات البشر جرثوم ساري
والله ما تلقى لها طبٍّ يعين
ومن تعاليم الزمن في وقت جاري
في الصدور وفي خلايا الحافظين:
* لا انْطَحَن انسان... دُوسه لا تداري
القويّ ما ينثني وإلّا يلين
* رمز «قوّه» وغيرها مثل الذواري
وخل عينك دوم للصيد السمين
* في حروب الكون كم عالَم تجاري
كوَّن الثروه من آلام وأنين
* وعالمك بِيعه إذا وافَقْت شاري
كلِّ شي للبيع لو حَبّة يقين
* ولا ترد الصوت في وقت الطواري
خل إذنك طين والأخرى عجين