إن صار وإلا ترى ما صار... الله يعين
هذي المنافع وَرَق وتطير ويّا الهوا
يا زين شخصٍ ركَد وقت العواصف رزين
في اللين وإلّا العسر فلا تردّى وهوى
ما زاد لمْع السنا إسمه ولو حبّتين
قَدْره يعَرْفه عدِل مرفوع بالمستوى
ما همّته العاصفه ما دام ركْنه متين
واللي نوى له نوى واللي بعد وما نوى
إيّاك يا صاحبي يا الجوهره يا الثمين
تضعف وطبعك ذهب ولا انحرف والتوى
أدري بدفْع الهوا شَرّه على الثابتين
لكن بقلبك ثقُل في جوهر المحتوى
ياما عذرتك وأنا ما طالبك يوم دين
عاذِر ظروف الغصن لمّا شِتَلْته وذوى
وانت الذهب في زمن كل ما تقادَم يزين
ما جيت لك أشتكي وإلّا أدوّر دوا
لكنّي أشرَه على من عايَد القريتين
وأنا اللي قلبي غطا وسراج فكري ضوا!