لا تسأل الداله إذا طاب له شان
ترى السؤال يجر ثقْل البلاوي
لا ما نسى، لو غلَّف القلب نسيان
أدنى الهبوب يهِد قلب الهواوي
كالمدّعي إنه تعافى من أزمان
وعن صحّته... أكثر كلامه دعاوي
جرح المسافر لا تشاوى ولا زان
ولا لقى له من طبيبٍ مداوي
شاف بمواقدهم كما خيط دخّان
ومقعي شمال اديارهم ذيب عاوي
وشاف بمنازلهم تصاديع جدران
وبالحوش سدره جذعها كان ذاوي
باقي بْمخازنهم ثقيلات الأوزان
وصندوق ما ينشال، ماله عراوي!