ما لقيت بدنيتي مثل البخيل
حتّى لو يعطي أبَد ماله قبول
يسحب أنفاسه من الصدر الهزيل
وتنقلب صُفْر الملامح للذبول
وإن عطا يعطي من النزْر القليل
چنّه يعطي من العمر عشرين حول
حنظله بالمُر معصوره تسيل
من قَبَلْها قابِل بموضع نزول
ارتفع بالنفس فوق المستحيل
يوم غيرك ما قوى صعب الوصول
لا تنزِّلها على حفّة مسيل
ولك منازل ما تمر فيها السيول
أصعب الحالات - حاشاك - الذليل
من قَبَل مَدّات جاهل بالأصول!