درايش : تعقيم «المجلس» من الفايروسات

نشر في 26-01-2022
آخر تحديث 26-01-2022 | 00:18
 وضّاح كل ما تطق الباب... رَدّوك حرّاس

مجلسنا چنّه "بنك" طالب حراسه!

يفتِّشون بموقفك حتى الأنفاس

وإلّا "دخولك" لا... يبي له دراسه!

وشهور "مغلق" يضرب أخماس بأسداس

عاطل وفايروس المرض في أساسه

فايروسهم منهم وفيهم ومحتاس

بين الكراسي منتشر في شراسه

قولوا لنا: نحمي الكورونا من الناس

اللي رُبى ما بين ربعه وناسه!

اللي تبونه يصير قَدْره على الراس

والمختلف لازم يوطّي براسه!

في دارنا شفنا العجب ماله قياس

حتى الكورونا حوّلوها سياسه

● وضّاح

back to top