درايش : الحكومة ما تغيّرت الناس تغيّروا!

نشر في 27-11-2019
آخر تحديث 27-11-2019 | 00:18
 وضّاح هذي الحكومه نفْس ذيچ الحكومه

لو غيّروا أشخاص... ما غيّروا شي!

لا زاد خصمك بالطمع لا تلومه

إن ما وجد منهو يرده عن الغي

المشكله في الناس صارت خَدومه

تسعى لبراد القاع وتدوّر الفَي

نلقى قبل بالدار لِحْيه امحشومه

في حلكة الظلمه تنوّر لنا ضي

ونلقى قبل ثابتْ وصلبه اعزومه

يحيي الغصون الذابله ويحسن الري

ما يقبل يشوف الحقوق امهضومه

يلوي حديد الوقت في موقفه لَي

دار الزمان ولفّنا في سمومه

اليوم وين ألقى ضميرٍ بعد حي؟!

الكل دش السوق وأرخص بسومه

والكل يطوي كلمته بالصدر طي

وتجاوزوا حتى الحكومه الرحومه

للمستوي من لحْمنا... للحْمنا الني

عَم الفساد ولبّسوهم هدومه

والمشكله إن الشعَب وَحَّد الزي!

back to top