درايش : الديرة ولّادة

لا تفتّش من ورا الشخص النزيه

دفتره مكشوف واضح في سجِلّه

كل زمانه ما قبَل إنّه يتيه

بالفجوج اللّي تضيّع كل ملّه

اقرا في صُفْر الورق (وانت النبيه)

تكتشف إنّه بقى ثابت محلّه

مانعٍ نفسِ اشتهت شيٍّ تبيه

إن حصل - في ما اشتهت- عيبٍ وزلَّه

نفْس "أمّاره" وتسأل ترتجيه:

ليش واقف في المطر وانت المظلّه؟!

كل من حولك عَلَوا حتّى السفيه

وانت يا "محارب هوا" ومجهول حَلّه!

الجواب إنّي مزاجي مشتريه

عندي أغلى من كنوز الكون كلّه

وانت قدوه وفاهم الطبع الشبيه

فيك "مبدا" ما تميل وما تملّه

شايلٍ حِمْلٍ ثقيلٍ باللي فيه

وعاقدٍ حبلك وحالف ما تفلّه

في يمينك هَم شعْبٍ محتميه

وفي يسارك فوّحَت بالعز دَلّه

انت ثابت في الزمن هذا الكريه

وحنا ربعك ما قبلنا في مذلّه

● وضّاح