درايش: اللي بالفخ أكبر من العصفور!

نشر في 07-04-2021
آخر تحديث 07-04-2021 | 00:18
 وضّاح كل ما طلع لك داخل الفخ عصفور

فتّش وتلقى شي غير العصافير

إلّا إذا فخّك ردي ماله سيور

حدّه يصيد الحُمّره والزرازير

وإلا عن الصيد الجزل كان مكسور

وإلا الحَبَال بديرتك فيه تحذير

كل يوم صدمه عن خبر شخص مشهور

لكن ولا شفنا أبد أي تغيير

الروض ما يثمر بلا عزوم ناطور

يبدا على الأرضه بـ "حملات تطهير"

يضرب بكفٍّ حاميه... يشرق النور

قانون والقانون يجلي الدياجير

الدار محكومه بميزان دستور

ماكو لسارق ديرته... أي معاذير

والخوف لو كتابنا خَطَّر اسطور

هَد الكبار وخَط بس الطراطير

ونقول صدنا طير وقَّف على السور

و فيه طير خليناه عن ساحته ايطير!!

وضّاح

back to top