درايش: أخوك

نشر في 24-02-2021
آخر تحديث 24-02-2021 | 00:18
 وضّاح هذا عضيدك وابتصِر في خطاياك

لو صار مهما صار يبقى عضيدك

أخوك لا دارت مع الوقت دنياك

تلقاه أقرب بالجسد من وريدك

تسمع حچي لكن كما عود تنباك

دخّان طاير بالهوا ما يفيدك

بعض السوالف ما توالم لمعناك

لو تختبرها في مطارق حديدك

تلقى الوهم والچذب والزور غطّاك

من ناقلين السالفه في بريدك

من كل كلبٍ عايشٍ جود يمناك

وإن دارت الدنيا ترى عض إيدك

والا سوالف ناعمه تطلب ارضاك

من ساحبات المرجله من رصيدك

بالحقد والغيره تطاوى على خطاك

واتْلِف في حبل العداوات قيدك

واتغافلك ترمي على اخوك بشباك

واتلحفّك ريش النعام وتزيدك

أخوك دمّك ساعة الجد يفداك

ينسى الزعل ماهو عدوٍ ضديدك

والدم ما هو ماي لو عندك إدراك

بس الغضب لأقصى بحورك يعيدك

روح انتبه قبل القوافل تعدّاك

وقبل الزمن بنبال غدره يصيدك

وضّاح

back to top