صدر العدد الأول بتاريخ 2 يونيو 2007

رئيس التحرير خالد هلال المطيري

العدد: 4466

رئيس التحرير خالد هلال المطيري

درايش..ناصر صباح الأحمد... هل صحيح «دربك حرير»؟!

  • 13-05-2020

جنّبْت، حاذَرْت أكتب حرفْ من صوبك

حتى لو الوِد باني خيامْ منصوبه

علّمني الوقت لا تجْهد بمكتوبك

كم غيمْ عدّى وبُشرى الخير أُكذوبه!

يا راسم الحلم يوم الناس هلّوا بك

اليوم وينك تشوف الروح معطوبه؟!

حنّا مع الدار نسند فيه مطلوبك

وإن حِدْت حِدْنا ولا من روح مغصوبه

"دستور" واضح تمجّد حكمته دوبك

و منْت اللي ينساه نوبه ويذكره نوبه!

لا ترسم أحلام وتعلّي لنا طوبك

من فوق ساسٍ هشاشٍ خافتٍ طوبه

إما تقوّى ويحمي درعك اجنوبك

وإلا يعتّك طويل الثوب بجيوبه

الفعل غير الحچي لو جِدْت بأسلوبك

الإيد وحده ونوايا الربع مقلوبه!

ما تنهض الدار يوم وينقضي نوبك

إلا بعزم وحزم وأفكار مشبوبه

ولا يطيب الهوا لا مَر بهبوبك

إلا بقوانين بين الناس مهيوبه

وما يثمر العُود لوّ يجود مسكوبك

إن كان ناسٍ على اسمك دوم محسوبه

ناسٍ تودّك وناسْ تدوّر عيوبك

هذا ودارك من الصوبين منهوبه

للعدل ميزان خلّه يضوّي ادروبك

ومن يخطي.. الوقت ما يغفر له اذنوبه