صدر العدد الأول بتاريخ 2 يونيو 2007

رئيس التحرير خالد هلال المطيري

العدد: 4387

رئيس التحرير خالد هلال المطيري

في القهاوي... الكلام المُر

  • 21-02-2020

ضحك، وأصوات، وسوالف

تختلط حولك تمرّك

وانت قاعد

تشرب القهوه بصمت ويحلى جوّك بالسّكوت:

هذا يشكي حق رفيجه من الإيجار ونار بأسعار البيوت

ذاك ابو الغتره الخفيفه بالطرف يشكي لربعه يقول وقّعنا وشرينا

بس حسافه

ما لقينا أي مسنّه تشيل أحجام "اليخوت".

واحد يبشّر رفيجه: في "بدَل" حق الطريج

وفي بدل "أعمال خطره" وفي "بدل لما تموت".

وواحد مبيّن وراهم منشغل في لابتوب وصفحته مليانه "أسهم"، كالمكينه يحسب آلاف وفوايد... ماله صوت

واحد المليون عنده شي عادي

وواحد يكسّر حسابه إن صار 5 من الشهر والحال واقف... ماكو قوت!

واحد الفنجان مُر

وواحد المشروب توت

ماكو "وسطى" في بلدنا

دمّروها

إللي عنده يعيش في أحلى حياة

(الله يزيده)

واللي ما عنده... يموت.