القيادة في شوارعنا...قلة أدب!!

نشر في 27-01-2020
آخر تحديث 27-01-2020 | 00:19
 وضّاح صورة الأخلاق تبدا من "المرور"

تقرا طبع "المجتمع" شنهو مساره

شوف لا سافرت... هو أول شعور

"المرور" تلاحظه ببدء الزياره

والله خير بدارنا كلٍّ يفور

فورة البركان يطبخ بالحراره

الشوارع ملك أبوهم في غرور

وچنّه عيب إللي يوقّف "للإشاره"!!

يدعمونك لو تهدّي للعبور

وتشتغل هِرْنات في ميتين حاره

وطايش "إيْبَتْوِن" وراسه راس ثور

مزخرف الوانيت غاطس بالغَماره

دَرْعَم وحنا على الدوّار دور

وإن نهيته سمّعك أقسى عباره

لا ذرابه لا مهابه للمرور

و"المرور" يعلّمك شكل "الإداره"!

back to top