العتب قَد الغلا

أحيان ياتيك العتب والملامه

من صاحبك... قَد الغلا والعشَم فيك

من كُبر قدْرك شَد ب إسمك حزامه

ولولا الهقاوي ما يقرِّب حواليك

عَدّك مثل نجمٍ تعلّى تهامه

ويجزل بمدحك كل ما حَل طاريك

من قال لك هالمجد ترقى سنامه

وبيض الفعايل عادةٍ لك تسليك

للطيب في وجيه المطاليق شامه

فيها تميِّز بالملا دون تشكيك

وما كل من خصّيت يبدي اهتمامه

للمعسره ناسٍ تحل الشرابيك

ومنت بمواجيب الرفاقا نعامه

حاشاك دفن الروس للي يناديك

وش مزْعلك لا شفت حمْل الجهامه؟!

ياما مسحت غيومها في أياديك

خذها بحياتك بالأوادم علامه

من صارحك إعلم ترى هو امصافيك

والا الذي يبطن ويخفي كلامه

بأول صهيل الخيل باجر يخليك

الصعب أبرك من طبوع الحمامه

درعك إليا من غبت يچعم معاديك

وأردى الربع...إللي يبون السلامه

وأطيبهم اللي في عيونك صعاليك