صدر العدد الأول بتاريخ 2 يونيو 2007

رئيس التحرير خالد هلال المطيري

العدد: 4275

رئيس التحرير خالد هلال المطيري

المواطن/ محمد أحمد عبدالله

  • 06-11-2019

من مواطن ماخذ الدنيا بركاده

حالم بداره ويحب الحالمين

ما يحب النقص أو نتْفة زياده

له مساطر من طباع الأولين

هالبسيط يشوف في شغله عباده

وهذي عاده من زمان الطيبين

يشرب القهوه / الأمل كل صبح ساده

وينتظر له شي... بس عيّا يبين!

يحلم بقانون له هيبه وسياده

ويحلم إنْ كل البشر متساويين

يحلم ب"نهضة بلد" أقصى مراده

وطرد كل فاشلْ وكل العاجزين

أحبطوه اليوم "أصحاب السعاده"

وماهو بس اليوم/ من مدّة سنين!

وأحبطوه اللي بمجلسهم قراده

العابثين الفاسدين المفسدين

ولمّا صارت شكوته للدار عاده

إتْهموه ابْتهمة "المتْذمرين"!!

أي تآمر في تذمّرنا ي ساده؟!

امْصَخت والله وكنّا صابرين

يا هل المعروف ودّوني "الإراده"

نحضر "الوقفات" ويّا المخلصين