صدر العدد الأول بتاريخ 2 يونيو 2007

رئيس التحرير خالد هلال المطيري

العدد: 4201

رئيس التحرير خالد هلال المطيري

درايش : هدايا

  • 26-07-2019

معْسر الوقت نِلْنا من إيدينه عطايا

قبل يرجع لطبعه حيث طبْعه ضنين

يوم شفتچ وفاضت في عيوني هدايا:

إلْتفاتچ، ونورچ، والكلام الرزين

آمنه الروح عندچ چِن كفّچ حنايا

ومنهو غيرچ حريصْ وللودايع أمين

من عرفتچ ونا اللي ما وَقَفْت لمرايا

أتمَنْظر بعينچ... وألقى إنّي أزين

يا صباح المباخر يا صباح القَرايا

من زرع في ضلوعي وردة الياسمين؟!

ومنهو لوّن وبدّل في عيوني الزوايا

ومنهو أحيا ورودٍ ذابله من سنين؟!

لو يوصّون قلبي ما استمَع للوصايا

منهو قال الحدايد ما تحن وتلين!

شفت ضارٍ شديدْ وقايدن له سرايا

عقب ذيك المعارك عندكم يستكين!

وشفت حُرٍ مجرَّب ما يهاب المنايا

مخلبه بالثنادي وناظره في العرين

حام وأرخى جناحه يوم دارت نوايا

وواهج الشوق حَدّه يم ذاك القطين