نجمة الصبح

نشر في 09-08-2007 | 00:00

يا نجمة الصبح كبدي منك مرهوقة

لاشع نورك علينا لا تغببيني

ستاير القلب من فرقاك مفتوقة

اصبر من العام لين إنك ذبحتيني

الود لو نتركه عنا وطاروقه

اظني ارتاح وانتي تستريحيني

لبيك يااللي تجر القلب وعروقه

كله على شان يوم انك تلبيني

تلحني لح ركب عجلوا سوقه

أو جل ذودٍ مسريهن شيابيني

عديت عن مبسم المجمول لاأذوقه

انا بلاي الحيا وادري على ديني

ياقلب ياللي من الجازي دنا عوقه

ياناس أشيروا عليها لا تقاصيني

وان كان قلبي تفلش عنه صندوقه

شدّوه لين اتجود فيه بإيديني

قالوا معاليق قلبك منه مسروقه

قلنا خذتها الضحا والناس واعيني

نمر بن صنت