درايش: الحل... في العلمانية

مو حرام الدم في أرضچ يسيل ؟!

والمساجد صايره ساحة نزال؟!

مو حرام نعيش في ليلٍ طويل

ومحّد يأذّن: بأن الليل طال؟!

وقارئ القرآن بالفهم الثقيل

صار ذبح الناس في شرعه حلال

هذا نبْت اللي زرَعْنا بكل جيل

هذا سقي الماي... فيه الحقد سال!!

من يرد الروح ؟! من يحيي القتيل

وش يفيد اليوم ترديد السؤال؟!

افتحوا البيبان للصدر العليل

خل تمر نسمات من ريح الشمال

«مدنيّة أمس» لو ترجع.. تزيل

كل أفكار التخلف والجدال

«مدِّنوا» الدولة، وفكّوا عن نزيل..

في سجن فكره، ومدِّوا له حبال

وكل مؤمن دين ... له ربٍّ وكيل

المهم ما يوصل حدود القتال

«المغول» ب سُورنا تشْبك فتيل

«المغول» ب بيتنا... و هُم «العيال»!!