صدر العدد الأول بتاريخ 2 يونيو 2007

رئيس التحرير خالد هلال المطيري

العدد: 4151

رئيس التحرير خالد هلال المطيري

درايش :القُمْري

  • 20-05-2019

ما غرّد القُمري على روس الأغصان

ولا سمعنا له معاني جزيله

ولا سِجَع بالصوت عذبات الالحان

إللي تعدّل لا انحنى الكيف... ميله

مي عادةٍ له... لا تعذّر ولا بان

غايب وطالت غيبته چم ليله

مكتوف مليوت الجناحين تعبان

ماله على ذيچ المرابع وسيله

طاويه هَم وسلّم لدور الأزمان

وهذي عزومه الفاتره ما تشيله

والليل وحشه إن سرى دون خلاّن

وعن مثلهم دنياه صارت بخيله

محتار مو لاقي أبد يوم انسان

قادر يفرّق: وَنّته من هديله!

ناجاه صوتٍ ما درى إنس أو جان

حسّه ثقيل وله معاني ثقيله:

ترى الغنا إعجاز في قلب الأكوان

فتّت جبال تشوفها مستحيله

والصوت لو ما بان في بعض الأحيان

يبقى صداه وفي ايدينه فتيله

إمّا تغرد لا غشا الوقت طوفان

وإلا إنسِحِب تحت الغصون الظليله

لكن ترى من جامَل الوقت خسران

وملعون من قزَّر حياته ب حِيله!