درايش : لا تقفلين الباب

نشر في 23-01-2019
آخر تحديث 23-01-2019 | 00:24
 وضّاح لا تقْفلين الباب خلّيه مفتوح

ترى الحرامي صار ما يسرق بليل

إش خوّفچ والليل كالسِر مفضوح

وحتّى الحرامي بدّل الوقت تبديل؟!

وضح النهار يبوق واضح ومسموح

ما بيننا يحمّل من الدار ويشيل

شوفيه بين الناس إيمر ويروح

ويضحك على اللي قال يا ويلك الويل

شللّي بقى حتى نحاذر من البوح

لا صار باقوا من سمانا قناديل؟!

بوق الأماني وسَّم القلب بجروح

وذبح الأمل أخطر من ذنوب قابيل

وأخطر ترى السرقات من يسرق الروح

وتبي تردّه والعزم منكسر حيل!

لا تقفلين الباب لوحٍ ورا لوح

والله يا بنتي شبعنا غرابيل

back to top