درايش : لا تعاتب أحد
نشر في 21-05-2018
آخر تحديث 21-05-2018 | 00:23
من يبيك تحس في عيونه يبيك حتى لو ساكت ولا يعلن غلاك ومن حلَف وأقسم بإنّه مشتريك الله أعلم شنهو قايل من وراك عادة الچذّاب في عيونه "تريك" يكشفه وتشوف حاله بارتباك وخل منهو ناكرٍ صنعة إيديك ووجَّه اظعونه مع الغربي هناك تاخذه ريحٍ وتالي ب يرتجيك وانت كيفك لا رجع يطلب رضاك انت لمّا تعاتب الشخص الركيك چنّك تعلّي مكانه لمستواك والطبايع نقش نص لوالديك ونص منّك، إنت صانعها تراك نقش دم ونقش راجع لك إليك كالقدر مكتوب ما منّه فكاك وانت حوض الورد للظامي الدريك ما ترد من جاك متعنّي... حشاك والرجال أشكال ظاهرها سميك والبواطن خافيه تنوي الهلاك لا تدخِّل شخص في عمرك شريك إلا منهو لا انكشف ظهرك حماك بين خلق الله الوحيد اللي يجيك في اشتداد الريح لا غابت سماك ولو عيوب الخلق كلها يوم فيك كان بعيون الرضا دايم يراك وصعب تلقى شخص مرسومٍ عليك في المبادي والفكر يتبع اخطاك روح وحدك في نجومٍ تحتريك النجوم اللي مسهّرها معاك
