درايش : شنو شغل «المحافظ»؟! شنو شغل «المختار»؟!

قانون صادر ب (قاف) و(ميم )

منسي ومحّد يمر صوبه

نص قرن عدّى على التعميم

وحروف بغبار مكتوبه

أختام لكن بلا تختيم

وأوراق صفرا ومشطوبه

بعض الوظايف تجي ترهيم

وبعض العطالات مطلوبه

وبعض الرواتب لها تحريم

و"البِشْت" ما نحْسب اذنوبه

وبعض العطايا مثل ترميم

للعاطل ونترس له اجيوبه

"مو حافظ" الدرس والتعليم

ياالله يا غافر التوبه

و"مو حافظ" إلا له التكريم

وشفنا له اخيام منصوبه

وبشوت زحمه على التسليم

ما چنها النفس مغصوبه

خلك بظلّك مع التعتيم

والشمس بالغيم محجوبه

ترى الشراهه عقب تكميم

تلفت لك الناس بأعجوبه

السين يسأل ولا من جيم

كل الإجابات مقلوبه!