درايش : من يمنع أجراس الفرح؟!

نشر في 09-03-2018
آخر تحديث 09-03-2018 | 00:17
 وضّاح إضرب "جرسنا" ما يهم وشْ يقولون

هذي سوالفهم جديده... قديمه

هُم أشْغلونا بالتفاهات يسعون

راحت "حليمه" وارجعت لك "حليمه"

عن القضايا الصج هم يتحاشون

وشطّار لا صارت بلا أي قيمه

ضد الفرح ضد الأغاني ويفتون:

تحليل رشوه من الإيدين "الكريمه"

"أسهم" فوايدها اطْلَعت چم مليون!

وذاك العقار يصير كسْب وغنيمه!

ومشاركين البلع في كل ماعون

ومحلّلين "الشرْك" في كل عزيمه

ومفتّشين قلوب ناسٍ يغنون

كل ذنبهم إن النوايا سليمه

هم وحْدهم "إسلام" والغير ملعون

وچِنّه "أُحد" آخر عهد بالهزيمه!

دَشّوا من الدستور والرمح مسنون

يخفون ما ينوي الخصيم لخصيمه

حتى اخْطفوا ديره بنوا حولْها حصون

وصارت تلَفّت بينهم كاليتيمه !

back to top