صدر العدد الأول بتاريخ 2 يونيو 2007

رئيس التحرير خالد هلال المطيري

العدد: 3783

رئيس التحرير خالد هلال المطيري

درايش : «نمى إلى علمي»... «المجلسين»

  • 05-02-2018

"نمى إلى علمي" خبر

والكل يعلم به و درى

"هالمجلسين" بشغلهم

هُم رجّعونا لى ورا

وإن "القوانين" انتهت

ب أدراج متروسه اغبره

لا "عضو" فكّر يشتغل

ولا على باله طرى

مر الفصل بعد الفصل

وكل الأمور مسكّره

وفد اجتمع في "القاهره"

ووفد اجتمع في "أنقره"

ووفدٍ في "برلين" انشكح

وما ندري ليش الفرفره؟!!

و"مشروع قانون" اننسى

من كنسله؟ من أخّره؟!

وبعض المشاريع انتهت

عقب الوعد... في المقبره

محّد يحاسب "نائبه"

لو شافه يخطي أشكرا

ولو شافه ينقز مستوى

إمن الفقر... "للمَلْيَره"!

وإن كان هذي حالنا

و "الوضع تحت السيطره"

لا تقول ليش ب هالبلد

الحال كالعُود انبرى

وكل المراكب سمّرت

ومركبنا بس... يرجع ورا؟!!