درايش : لا تحلّونه...

وضّاح

نشر في 30-09-2016

وضّاح

ليش؟! يا زِينه.. مؤدّب عمره ما حاسَب وزير

"مجلس" ينفّذ أوامرْ... شايل أختامه معاه

الحكومه لو تخزّه... يروح جِنّه يبـ يطير

يوقّع ويبْصم ويختم للورق وجهه وقفاه!

بعضهم ما كان يحلم حتّى في منصب مدير

صار في غفله يشرّع عند من باعه وشراه

مرّت اسنينه الأربع مـ انْسِمَع إلا الشخير

الشعَب ناسيه والله والزمن عدّا ونساه

في أساميهم جهَلْنا وحنا في الربع الأخير

"المجلس" اللي ما درينا وين أرضه أو سماه!

لا تحلّونه... هـ "المجلس" والله ما مثله بيصير

إلا إن كانت "نوايا"... والأمر في شي وراه!!!