العذر مكتوب

العذر مكتوب لاصار الخطا مقري

اسف على ضحكتي اسف على أحزاني

خطـاي معـذور والا غلطتـي عـذري

ومرارة العـذر فـي قلبـي وبلسانـي

مدرى وش اللى ذكرته وضاق به صدري

مدرى وش اللـي نسيـت ولاتناسانـي

لبست أنا ثـوب لا طولـي ولا قصـري

يا طيبة القلب... وين القلـب ودانـي؟

سنتين من عمرها مرت ومـن عمـري

سنتين احـس الزمن فيها تعداني

سنتين مرت حياتي مـن ورا ظهري

والحب سجني ومسجوني وسجاني

والشعر مطرود من قلبي ومن فكري

سنتين ماني بأنـا ماني بحد ثاني

غنيت للناس والدنيا على خبري

والشعر في دفتري مغرور وإنساني

غنيت للحب يوم عيونها تغري

يوم الوفا والكلام الطيب ألحاني

غنيت للدمع يوم أن البكا كبري

واليوم أنا اكبر من دموعي وحرماني

اليوم ماعاد يمدي اللـي جرح يبري

مليت من كثرة حطاياهم وغفراني

مليت أنا الشعر مل الشعر من شعري

مليت انا الحب مل الحب وجداني

ليه أنكسر بالعيون اللي تبي كسري

ليه اتغرب ورا حزني وكتماني

العين ماتستحي والوجه مايذري

ماعاد يجزي هل المعروف بإحساني

لو هي عليّه عزيز النفس من صغري

ما أشاور القلب في كرهي لعدواني

إن رحت ياكثرهم وإن جيـت ياكثري

ضاقت بي عيونهم لو كنت وحداني

تعبت وازريت... ما مليت مـن صبري

ليت الذي راح مني كثر ما جاني

أحيان ودي أطيح مـن التعب وازري

وتشيلني عزتي وسلوم جداني..